صارلي فترة طوياة قاطعة عنكم بس الشي هذا مو بدون سبب

تدرون الكل يمر بأشياء تخليه ياخذ بريك من كل شي

تخيلوا إني قطعت النت و المسنجر و وااااااايد أشياء

بس عشان أصفي مخي من الأفكار السودة و من الصدمات اللي كليتها بحياتي من 2007 لي نص هالسنة الحالية (2010) بس الحمدالله تخطيت هالمرحلة و بجدارة

بس اللي يغثني إنه مرات أفكر بكلمة "لو" و صايرة ملازمتني في وايد أشياء

بدش بموضوع شوي مو الكل يؤمن فيه أو يطالعه بس ميخالف ودي أقول

بما إني من مواليد برج الحوت فمعروف عن هالبرج إنه برج حالم و وااااااايد يحب يتخيل و خياله جداً واااااااسع

و خيالي باختصار يتركز على إني أقدر أخلي الناس سعداء و يتوفر لهم كل شي يتمنونه عن طريق توفيري لهذي الأشياء لهم

يمكن شي يضحك بس هذا تفكيري و يمتد لي إني أتخلص من تلوث البيئة و أصير عالمة بكذا مجال و أكون متعددة اللغات و إلخ من الأحلام الحلوة و اللي تضحك بالنسبة لكم

اكتشفت إنه كل هالخيال ماله أي لزوم

لأنه بهالزمن الأغلبية يدورون مصلحتهم و نفسهم فقط و الأقلية يسعون لمصالح الناس و يسمونهم خرفان أو سذّج... متخيلين هالتسميات...وايد تعور

و في ناس طبعاً تقولك لأ آنا أدور مصلحة الناس و أنصح و إهوا من جماعة اللي يبون مصلحتهم

صارلي ألحين قرابة الشهر أفكر...ليش الناس تغيروا؟؟؟ شنو اللي دخل هالعالم و خلاه عالم مشاعره قبيحة يتسم بأنه الناس يقابلون بعض بابتساااامة و قبول و بقلوبهم النية السيئة و الكره و أول ما يصادف شخص ثاني يبدي يقرض بالأوادم كلها و تصير سلسلة من الغيبة و النميمة...شي يخليك تفكر مرتين قبل لا تتكلم مع أي شخص

و آنا عن نفسي قررت من سنة إني ما أتقبل الصداقة برحابة صدر لأنه مو الكل صار يتسم بالوفاء...الشي اللي يضحك إني نقلت لكلية التربية الأساسية و ماعندي ولاااااا صديقة وحدة مع إنه البنات يتوافدون علي عشان صداقتي لكن بالنهاية يرخون الحبل عني لأني وااااااايد أعطي طاف أو بمعنى آخر ....ما أدق عليهم أو أسلم إلا في حالة تقابلت معاهم وجهاً لوجه

و هالشي وااااااااااايد نفعني من نواحي عدة...منها إني صرت أدرس و أييب درجات سنعة و معدلي فوق 3 من 4 يعني تقدم بالنسبة لي

الشي الثاني إني صرت أجابل أهلي أكثر و صداقتي صارت قوية بأخواني و بنات أختي اللي وااااااايد أحبهم اكثر من أي ناس بالدنيا

الشي الثالث إني صرت أنتفع من هالمثل "فاتورة الهاتف هي أبلغ دليل على أن الصمت أوفر بكثير من الكلام" يعني ما قمت أسولف بالتلفون مثل قبل كأني مجنونة الهاتف النقال و هم قلل من مصاريف طلعاتي معاهم و مناسباتهم و أعياد ميلادهم... من الآخر إعانتي صارت لي و تكفيني و زود و أشتري فيها غير الكتب و الأكل و دفع الفواتير

الشي الرابع و الأهم إنه الناس ماعندهم شي يتكلمون فيه عني غير ملابسي و نقاشي مع الدكاترة اثناء المحاضرات

الشي الأخير و الأهم بالنسبة لي...صرت أهتم بنفسي بالدرجة الأولى...صرت أهتم بصحتي...يعني مثل ما تقولون لما الشخص يكون تعبان وجهه يكون مائل للصفرة و يصير كأنه عمره في أواخر الثلاثينات و إهو توه في أول العشرينات...مثل حالتي يعني..فالحمدالله كل شي قاعد يصير مثل ما أبيه بس باقي الوقت يمر عشان أشوف أحلامي تتحقق الواحدة تلو الأخرى

أتمنى إنه تشوفون مذكرتي ولو إنها مو موضوع معين لكنها حالتي الحالية و شنو قاعد أفكر فيه

و طلب للجميع ودي لو كل واحد يقول شنو الميزة بشخصيته و الناس تنظر لها كأنها عيب من عيوبه (إن وجد) و سلامتكم

2010-09-29         04 10